सौ. एएनआय
श्रीनगर/जम्मू, १५ मार्च: सुरक्षा दलांना मोठे यश मिळाले आहे. भारतीय लष्कर आणि जम्मू-कश्मीर पोलिसांनी संयुक्त मोहीम राबवून उत्तर काश्मीरमधील बारामुल्ला जिल्ह्यातील उरी सेक्टरमध्ये घुसखोरीचा प्रय्नास हाणून पाडला आणि एका पाकिस्तानी दहशतवाद्याला कंठस्नान घातले. ही मोहीम १४ आणि १५ मार्चच्या दरम्यानच्या रात्री उरी सेक्टरमधील बुचर भागात राबविण्यात आली. अधिकृत सूत्रांनुसार, जम्मू-कश्मीर पोलिसांना मिळालेल्या विशिष्ट गुप्त माहितीच्या आधारावर ही मोहीम सुरू करण्यात आली होती. माहितीत सांगितले होते की, दहशतवाद्यांचा एक गट नियंत्रण रेषा (एलओसी) ओलांडून या भागात घुसखोरी करण्याच्या तयारीत आहे. माहिती मिळताच भारतीय लष्कर आणि जम्मू-कश्मीर पोलिसांच्या विशेष कार्यदलाने (एसओजी) संयुक्तपणे परिसराला वेढा घालून शोध मोहीम सुरू केली. भारतीय लष्कराच्या एका वरिष्ठ अधिकाऱ्याने सांगितले की, रात्रीच्या अंधारात सुरक्षा दल झुडपांची तपासणी करत असताना त्यांना एक संशयास्पद हालचाल जाणवली. जवानांनी तात्काळ दहशतवाद्याला थांबण्याचा आणि शरण येण्याचा इशारा दिला; परंतु त्याने उलट सुरक्षा दलांवर अंदाधुंद गोळीबार सुरू केला. लष्कराच्या जवानांनी शिताफीने परिस्थिती हाताळत दहशतवाद्याच्या गोळीबाराला योग्य प्रत्युत्तर दिले. अधिकाऱ्याने सांगितले, “जवानांनी झुडपात एका दहशतवाद्याची संशयास्पद हालचाल पाहिली. त्याला रोखण्याचा प्रयत्न केला असता त्याने अंदाधुंद गोळीबार सुरू केला. सुरक्षा दलांनी या हल्ल्याला चोख प्रत्युत्तर देत दहशतवाद्याचा जागीच खात्मा केला.” मोहीम संपल्यानंतर परिसराची तपासणी केली असता मारल्या गेलेल्या दहशतवाद्याकडून मोठ्या प्रमाणात शस्त्रे आणि दारुगोळा जप्त करण्यात आला. जप्त केलेल्या साहित्यात एके-४७ रायफल, एक पिस्तूल आणि मोठ्या प्रमाणात काडतुसे यांचा समावेश आहे. प्राथमिक तपासात असे आढळून आले आहे की मारला गेलेला दहशतवादी पाकिस्तानी नागरिक होता आणि तो कोणत्या तरी दहशतवादी संघटनेचा सदस्य होता. तो कोणत्या संघटनेशी संबंधित होता आणि त्याचा हेतू काय होता याबाबत ओळख पटवली जात आहे. लष्कराच्या प्रवक्त्याने सांगितले की, या चकमकीनंतरही संपूर्ण परिसरात सुरक्षा दलांची शोध मोहीम सुरू आहे. ते म्हणाले, “परिसरात अजूनही अन्य दहशतवादी लपून असल्याची शक्यता आहे. लष्कर आणि पोलिसांची संयुक्त पथके परिसराला वेढा घालून आहेत आणि व्यापक शोध मोहीम राबविली जात आहे, जेणेकरून इतर कोणत्याही संभाव्य धोक्याचा निःपात करता येईल.”
ही कारवाई सीमापार होणारे घुसखोरीचे प्रयत्न हाणून पाडण्यात भारतीय सुरक्षा दलांची सतर्कता आणि अचूक कारवाई अधोरेखित करते. उरी सेक्टर, जे गेल्या काही वर्षांत दहशतवादी घुसखोरी आणि सीमापार गोळीबाराचे एक प्रमुख केंद्र राहिले आहे, तेथील ही कारवाई परिसरात शांतता आणि सुरक्षा राखण्यासाठी सुरक्षा दलांची अढळ बांधिलकी अधोरेखित करते. पोलिस आणि लष्कराच्या या संयुक्त मोहिमेचे परिसरात मोठ्या प्रमाणात कौतुक होत आहे.