नांदेडमध्ये सहाव्या पुण्यतिथीनिमित्त यादव महासभेची श्रद्धांजली सभा
नांदेड, दि. २८ जुलै (जिल्हा प्रतिनिधी) ————— ज्येष्ठ समाजसेवक, विचारवंत तथा यादव महासभा महाराष्ट्राचे माजी प्रदेश महासचिव स्व. चौधरी भानुदासजी परशुराम यादव (भानु भैय्या) यांच्या सहाव्या पुण्यतिथीनिमित्त यादव महासभेच्या वतीने आज मंगळवारी संध्याकाळी ५ वाजता वजीराबाद येथील ‘यदुकुल’ मध्ये भावपूर्ण श्रद्धांजली सभा पार पडली.सभेच्या प्रारंभी भानु भैय्यांच्या प्रतिमेस पुष्पहार अर्पण करून व श्रद्धासुमने वाहून उपस्थित मान्यवरांनी त्यांना अभिवादन केले. यावेळी प्रज्ञा जागृती मिशनचे सचिव गगन यादव, माजी नगरसेवक किशोर यादव, नगरसेवक प्रतिनिधी धीरज यादव, शिवसेना उपशहर प्रमुख स्वराज यादव आणि डॉ. कैलाश भानुदास यादव यांनी आपल्या विचारांतून भावोक्ती व्यक्त केली. त्यांनी भानु भैय्यांच्या सामाजिक, धार्मिक, शैक्षणिक व आर्थिक क्षेत्रातील उल्लेखनीय कार्याचा आढावा घेतला. वक्त्यांनी सांगितले की, भानु भैय्यांच्या दूरदृष्टीमुळे समाजात मोठी जागृती झाली. शिक्षणाचा प्रसार व्हावा आणि समाजात सेवाभावी वृत्ती रुजावी, यासाठी त्यांनी अथक परिश्रम घेतले. त्यांच्या या कार्याचा आदर्श आपण सर्वांनी जपला पाहिजे, असे आवाहनही यावेळी करण्यात आले. या श्रद्धांजली सभेस अखिल भारतीय यादव महासभेचे राष्ट्रीय महासचिव बिशन कुमार यादव, भारत यादव, गोपाल फतेलष्करी, सतीश (छोटू) यादव, संजय फुलारी, ईश्वर (कालू) बटाववाले, अजय यादव, बाळू कुलकर्णी, भावेश यादव यांच्यासह मोठ्या संख्येने समाजबांधव उपस्थित होते. कार्यक्रमाच्या समारोपाला उपस्थितांनी भानु भैय्यांच्या पवित्र स्मृतीस अभिवादन करून त्यांचे विचार, संस्कार व समाजकार्य पुढे नेण्याचा निर्धार व्यक्त केला.